អំពី​កំណត់ហេតុ​បណ្ដាញ


សួស្ដី កំណត់ហេតុ​បណ្ដាញ​នេះ មាន​តំណ​អាសយដ្ឋាន www.akbalthom.blogspot.com តែ​ខ្ញុំ​បាន​ទិញ​ឈ្មោះ domain ទៅ​ជា www.akbalthom.art វិញ ។ ខ្ញុំ​មិន​មែន​ជា​សិល្បករ ​អ្នក​វិចិត្រករ ឬ អ្នក​រចនា​​ធំ​ដុំ​ប៉ុន​ភ្លៅ​អ្វី​នោះ​ទេ ! ហើយ​​ការ​ឆ្លាក់​អក្សរ ក៏​​ខ្ញុំ​មិន​ចេះ​ដែរ ។ តែ​ដោយសារ​បាន​ប្រើ​កម្មវិធី​ក្រាហ្វិក​ក្នុង​កុំព្យូទ័រ​តិច​តួច ដែល​អាច​គូរ​អក្សរ ពត់​អក្សរ​បាន ផ្សំ​ជាមួយ​ចំណូល​ចិត្ត​ និង​ការ​ចំណាយ​ពេល​ច្រើន​លើ​ផ្នែក​នេះ ដោយ​មិន​ខ្លាច​អត់​អី​ស៊ី ធ្វើ​ឲ្យ​ខ្ញុំ​អាច​តម្រៀប​អក្សរ​ដែល​ខ្ញុំ​គូស​ហើយ​បង្កើត​បាន​ជា​ពុម្ព​អក្សរ​ខ្មែរ ដែល​អាច​ប្រើ​ការ​បាន​ខ្លះៗ​ដែរ តែ​មិន​ស្តង់ដារ​ក្នុង​ការ​គូស​ពុម្ព​អក្សរ ដូច​គេ​អ្នក​ជំនាញ​នោះ​ទេ ដែល​នេះ​លោកអ្នក​ត្រូវ​ដឹង​កម្រិត​របស់​ខ្ញុំ​នៅ​ខ្សោយ ដែល​មិនអាច​ប្រៀបធៀប​ជាមួយ​គេ​បាន​នោះ​ទេ ។ បង្កើត​ពុម្ព​អក្សរ​សម្រាប់​ប្រើប្រាស់​ផ្ទាល់​ខ្លួន តែ​បើ​មាន​អ្នក​ចង់​ប្រើ​ដែរ​អាច​ទាក់ទង​ទិញ​បាន តែ​បើ​ដាក់​ឲ្យ​ទាញ​យក Free គឺ​លែង​មាន​ទៀត​ហើយ ។

៙ អំពី​អត្ថបទ​ក្នុង​កំណត់ហេតុ​បណ្ដាញ​នេះ ៖

និយាយ​អំពី​ពុម្ព​អក្សរ​របស់​ខ្ញុំ និង​ពុម្ព​អក្សរ​ខ្មែរ​ដទៃៗ​ទៀត​ដែរ ៖ ដោយសារ​ខ្ញុំ​ចូលចិត្ត​រចនា​ពុម្ព​អក្សរ និង​ប្រើប្រាស់ Blogger ដើម្បី​កត់​ត្រា ជាជាង​ប្រើប្រាស់ Facebook នោះ ខ្ញុំ​ក៏​បង្កើត​ Blog នេះ​តាំង​ពី​ឆ្នាំ​ ២០១២ ឡើង​មក​ទៅ ដោយ​​ប្រើប្រាស់​មកដល់​សព្វថ្ងៃ​នេះ។ ការ​ប្រើប្រាស់​ដំបូង​វា​មាន​រូបរាង​មិន​ទំនើប ​រហូត​មក​ដល់​សព្វថ្ងៃ​ខ្ញុំ​បាន​ទិញ template មួយ​នេះ​មក​​ដាក់​ដើម្បី​ឲ្យ​ងាយស្រួល​មើល ហើយ​នៅ​ផ្នែក​ខាង​ក្រោយ​បង្អស់​គឺ​ជា​អ្នក​រចនា​ពុម្ព​អក្សរ​ខ្មែរ​យើង ដែល​ខ្ញុំ​ប្រមូល​ដាក់​មួយ​ដុំ​ងាយស្រួល​មើល និង​ទាញយក ។ សម្រាប់​គន្លឹះ​រចនា​ពុម្ព​អក្សរ​ក៏​មិន​បាន​ដាក់​ឲ្យ​ទេ ព្រោះ​អី​ខ្ញុំ​មិន​មែន​អ្នក ជំនាញ ណាមួយ​គន្លឹះ​នោះ​វា​មិន​សម​នឹង​ដាក់​ឲ្យ​គេ​ធ្វើ​តាម​នោះ​ទេ (ដើរ​ខុស​ផ្លូវ) ។

និយាយ​អំពី​វិជ្ជា​ធ្វើ​ម្ហូប ៖ ខ្ញុំ​អត់​ចេះ​ធ្វើ​ម្ហូប​ទេ តែ​ចូលចិត្ត​មើល​ការ​ធ្វើ​ម្ហូប ដូច្នេះ​ខ្ញុំ​ក៏​ប្រមូល​អត្ថបទ​និង​វីដេអូ​ដែល​ទាក់ទង​នឹង​វិជ្ជា​ធ្វើ​ម្ហូប​យក​មក​ចុះ​ផ្សាយ​ក្នុង Blog នេះ​ឡើង​វិញ ដោយ​ជ្រើសរើស​យក​តែ​អត្ថបទ​ណា​ដែល​មាន​ដាក់​ចំនួន​គ្រឿងផ្សំ​​ជាក់លាក់ សង្ឃឹម​ថា​វា​នឹង​ជួយ​ឲ្យ​យើង​អាច​រៀន​ចេះ​ធ្វើ​ម្ហូប​បាន​ងាយស្រួល ។

គន្លឹះ Blogger ៖ ដោយសារ ​Blogger នៅ​ពេញ​និយម និង​មាន​ប្រយោជន៍​នៅ​ឡើយ​ ប្រាកដ​ជា​មាន​អ្នក​ថ្មី ចូល​មក​ប្រើប្រាស់​និង​រៀន​ប្រើ​ជា​មិន​ខាន ដូច្នេះ​គន្លឹះ​ប្លក់​ពិត​ជា​សំខាន់​សម្រាប់​អ្នក​ទើប​រៀន​ប្រើ ។ ខ្ញុំ​នឹង​ប្រមូល​គន្លឹះ​ប្លក់​មាន​ប្រយោជន៍​ឲ្យ​បាន​ច្រើន​តាម​ដែរ​អាច​ធ្វើ​ទៅ​បាន ។

ក្រាហ្វិក ៖ គឺ​ជា​ផ្នែក​ដែល​ខ្ញុំ​ចូលចិត្ត​តិចៗ​ដែរ ដូច្នេះ​បើ​នៅ​ពេល​ខ្ញុំ​គូរ​ក្រាហ្វិក​អ្វី ដែល​ចង់​ចែករំលែក​ឲ្យ​បាន​ប្រើប្រាស់​ដល់​អ្នក​ដទៃ​នៅ ខ្ញុំ​នឹង post និង​ដាក់​ទាញ​យក​ទៅ​ប្រើប្រាស់​ដែរ ។ ដូចជា ស៊ុំ រូបភាព​ដែល​គូស​ក្នុង​កុំព្យូទ័រ និង​អាច​ដាក់ Link ឲ្យ​ទាញ​យក​ក្រាហ្វិក​របស់​អ្នក​ដទៃ​ផង​ដែរ ។

៙ អំពី​ម្ចាស់​កំណត់ហេតុ​បណ្ដាញ​នេះ ៖

ចំណែក​ខ្ញុំ​បាទ​ឈ្មោះ នៅ សំណាង (កើត​ឆ្នាំ ១៩៨៨) ដែល​ក្នុង​អ៊ីនធឺណិត​នេះ​ខ្ញុំ​ប្រើ​ឈ្មោះ​ អាក្បាលធំ / AKbalthom ដែល​​ខ្លី​ងាយស្រួល​ចាំ​ ។ ​ហើយ​នេះ​គឺជា​ជីវិត​តូច​មួយ​ក្នុង​ទីក្រុង​ភ្នំពេញ, ការ​រចនា​ពុម្ព​អក្សរ​ខ្មែរ​របស់​ខ្ញុំ​ មិន​បាន​រៀន​ពី​ណា​មក​ទេ គ្រាន់តែ​ទំនេរ​ចេះ​តែ​គូរ​ចុះ​ឡើង និង​ធ្វើ​តាម​ម៉ូដ​ចាស់​ៗមួយ​ចំនួន ។ ពី​មុន​ធ្លាក់​ដាក់​​ឲ្យ​ទាញ​យក តែ​ឥឡូវ​ឈប់​ដាក់​ហើយ ព្រោះ​អ្នក​ប្រើប្រាស់​អត់​ចេះ​គិត ដោយ​មាន​ក្រុមហ៊ុន​មួយចំនួន​ ​យក​ទៅ​ប្រើប្រាស់​ក្នុង​ផ្លូវ​ពាណិជ្ជកម្ម​របស់​ពួក​ដោយ​មិន​បាន​គិតគូរ​ដល់​អ្នក​រចនា​ ។
ទៅ​ថ្ងៃ​មុខ ខ្ញុំ​នឹង​ព្យាយាម​បង្កើត​ម៉ូដ​អក្សរ​ខ្មែរ​ឲ្យ​បាន​ច្រើន និង​មាន​គុណភាព ព្រោះ​នៅ​ក្នុង​ខួរក្បាល​របស់​ខ្ញុំ មាន​រូបរាង​អក្សរ​ជា​ច្រើន​ទៀត ។

- ឈ្មោះ : នៅ សំណាង / Nouv Samnang
- ឈ្មោះ​​ហៅ​ក្នុង​អ៊ីនធឺណិត​ : អាក្បាលធំ / AKbalthom
- ឆ្នាំ​កំណើត : ១៩៨៨
- រស់នៅ​សព្វថ្ងៃ : ​ភ្នំពេញ ប្រទេស​កម្ពុជា
- ចំណូល​ចិត្ត​ : រចនា​ពុម្ព​អក្សរ​ខ្មែរ

Contact:

  • Tel: (Smart) 069 556 887
  • Tel: (Cellcard) 089 556 887
  • Email: akbalthom@gmail.com
  • Website: www.akbalthom.blogspot.com

    Post a Comment

    Whatsapp Button works on Mobile Device only

    វាយតែមួយពាក្យដែលអ្នកចង់ស្វែងរក